Radyo Tele Aksyon Katolik

Vwa Ayisyen Katolik nan Atlanta, GA

Se premye Radyo Katolik Ayisyen an liy nan Atlanta. Li rive fonde gras ak "Chaplaincy" Ayisyen-an nan Achidyosèz Atlanta-a.

Rev. pè Carl Jean, c.s., ki se omonye Ayisyen katolik yo, te santi genyen yon mank nan simaye Pawòl Bondye-a nan tout kwen. Poutèt sa, li deside, avèk konkou kèk volontè, mete Radyo sa-a sou pye.

Istwa RTAK

Aprè yon konsta ak nesesite pou gaye pi lwen Pawòl Bondye-a, epi edike Pèp Bondye-a nan diferan domèn, lè nou gade distans moun yo rete nan zòn metropolitèn Atlanta-a: Rev. pè Carl JEAN, C.S. ak yon ekip moun ki gen bòn volonte tankou Phador JEAN-FRANÇOIS, Dario M. CLÉNA, Edmond FÉTIÈRE, Joseph DURAND ak Jean Harold JOSEPH deside, depi mwa fevriye 2023, kòmanse travay pou mete sou pye yon Radyo an liy. Aprè anpil tan travay, yo lanse ofisyèlman Radyo-a jou ki te samdi 09 septanm 2023.

RTAK rive fonde, sitou gras ak yon potorik gason nan kominote Ayisyen-an ki fè tout manèv teknik yo. Potorik gason sa-a rele pastè Max LOUISSAINT, anpil moun konnen sou non CS. Li genyen plis pase 20 lane eksperyans nan domèn nan, epi li se direktè-fondatè "Radio Tele Grace FM".

Radyo Tele Aksyon Katolik (RTAK) sou pye pou sèvi tout kominote Ayisyen-an san paspouki nan nivo sosyal, relijye ak kiltirèl. Premye wòl Radyo-a se evanjelizasyon, fòmasyon, enfòmasyon ak distraksyon ki pral baze sou: KONNEN LAFWA-W, VIV LAFWA-W, PATAJE LAFWA-W. Baz sa-a fè referans ak baz pwojè pastoral Achidyosèz Atlanta-a.